Get Adobe Flash player

ເມືອງຕຸ້ມລານສຳເລັດກອງປະຊຸມໃຫຍ່ຊາວໜຸ່ມທົ່ວເມືອງ ຄັ້ງທີ VIII

ໃນຕອນເຊົ້າວັນທີ 3ຕຸລາ 2018 ຜ່ານມານີ້ ຄະນະບໍລິຫານງານຊາວໜຸ່ມເມືອງຕຸ້ມລານ ແຂວງສາລະວັນ ໄດ້ເປີດກອງປະຊຸມໃຫຍ່ທົ່ວເມືອງ ຄັ້ງທີ VIIIຂື້ນຢ່າງເປັນທາງການ ຢູ່ສະໂມສອນໃຫຍ່ເມືອງຕຸ້ມລານ

ພາຍໃຕ້ການເປັນປະທານຂອງ ສະຫາຍ ນ ສຳລັງ ບຸດຕະລາດບົວສີ ຄະນະບໍລິຫານງານຊາວໜຸ່ມແຂວງສາລະວັນ ເລຂາຄະນະບໍລິຫານງານຊາວໜຸ່ມເມືອງຕຸ້ມລານ ໃຫ້ກຽດເຂົ້າຮ່ວມກອງປະຊຸມໃນຄັ້ງນີ້ໂດຍ ສະຫາຍ ຈັນສີລອນ ສີສົມບູນ ກຳມະການພັກແຂວງ, ກໍາມະການສູນກາງຊາວໜຸ່ມ ປະຊາຊົນ ປະຕິວັດລາວ, ເລຂາຄະນະບໍລິຫານງານຊາວໜຸ່ມແຂວງ, ມີ ສະຫາຍ ຈັນສະໝອນ ພົມມະແສງ ກໍາມະການພັກແຂວງ, ເລຂາພັກເມືອງ ເຈົ້າເມືອງໆ ຕຸ້ມລານ, ມີກຳມະການພັກເມືອງ, ຫົວໜ້າຫ້ອງການ, ຮອງຫ້ອງການ, ຜູ້ແທນຊາວໜຸ່ມຈາກຮາກຖານບ້ານ ແລະ ອ້ອມຂ້າງເມືອງພ້ອມດ້ວຍສະມາຊິກຊາວໜຸ່ມ, ແຂກຖືກເຊີນ ແລະ ພະນັກງານອາວຸໂສບຳນານເຂົ້າຮວ່ມທັງໝົດ 173 ສະຫາຍ, ຍິງ 33 ສະຫາຍ. ໃນນັ້ນມີຜູ້ແທນສົມບູນ 136 ສະຫາຍ, ຍິງ 22 ສະຫາຍ.

       ໃນວາລະກອງປະຊຸມ ສະຫາຍ ຂັນທອງ ວັນນະວົງ ຮອງເລຂະຄະນະບໍລິຫານງານຊາວໜຸ່ມເມືອງ ກໍ່ໄດ້ຂື້ນຜ່ານບົດລາຍງານການເມືອງ ໃນໄລຍະ 5 ປີຜ່ານມາ ແລະ ແຜນສູ້ຊົນ 5 ປີຕໍ່ໜ້າ ຜ່ານການຈັດຕັ້ງປະຕິບັດການເຄື່ອນໄຫວ ວຽກງານຊາວໜຸ່ມ-ເຍົາວະຊົນ ທົ່ວເມືອງມີສະມາຊິກຊາວໜຸ່ມປະຊາຊົນ ປະຕິວັດລາວ ທັງໝົດ 3,062 ສະຫາຍ, ຍິງ 1,019 ສະຫາຍ. ມີກອງເຍົາວະຊົນທັນວາ 8 ກອງ, ມີ 56 ໝວດ ແລະ 285ໝູ່ ມີສະມາຊິກເຍົາວະຊົນໃນເກນອາຍຸ 9 -14 ປີ 2,838 ນ້ອງ, ຍິງ 916 ນ້ອງ ຂະຫຍາຍໃໝ່ 796 ນ້ອງ, ຍິງ 342 ນ້ອງ ແລະ ຈຳນວນອະນຸຊົນໃນເກນອາຍຸ 6-8 ປີ.344 ນ້ອງ, ຍິງ 189 ​ນ້ອງ ຂະຫຍາຍໃໝ່ 142 ນ້ອງ,​ຍິງ 99 ນ້ອງ ເຊິ່ງໄດ້ສະແດງອອກສະມາຊິກຊາວໜຸ່ມທົ່ວເມືອງໄດ້ຮັບການຍ້ອງຍໍຂັ້ນແຂວງ 312 ສະຫາຍ, ຍິງ 84 ສະຫາຍ, ຂັ້ນເມືອງ 468 ສະຫາຍ, ຍິງ 83 ສະຫາຍ, ກອງປະຊຸມກໍ່ໄດ້ປ່ອນບັດຄັດເລືອກເອົາຄະນະບໍລິຫານງານຊາວໜຸ່ມເມືອງຊຸດໃໝ່ ເຂົ້າມາຮັບຜິດຊອບເພື່ອຊີ້ນຳ - ນໍາພາການເຄື່ອນໄຫວວຽກງານຊາວໜຸ່ມ - ເຍົາວະຊົນ ໃຫ້ເປັນຂະບວນການຟົດຟື້ນ,ເຊິ່ງມີຜູ້ສະໝັກທັງໝົດ 21 ສະຫາຍ, ຍິງ 4 ສະຫາຍ, ຄັດເລືອກເອົາ 19 ສະຫາຍ, ຍິງ 4 ສະຫາຍ, ຜົນຂອງກອງປະຊຸມຄັ້ງປະຖົມມະລຶກຄັ້ງນີ້ໄດ້ຕົກລົງແຕ່ງຕັ້ງເອົາ ສະຫາຍ ນ ສໍາລັງ ບຸຕະລາດບົວສີ ເປັນເລຂາຄະນະບໍລິຫານງານຊາວໜຸ່ມເມືອງຕຸ້ມລານອີກສະໄໝໜຶ່ງຄັດເລືອກເອົາສະຫາຍ ສອນໄຊ ພົມສະຫວັນເປັນຮອງເລຂາ ແລະ ສະຫາຍ ຂັນທອງ ວັນນະວົງ ເປັນຮອງເລຂາທັງເປັນປະທານກວດກາພ້ອມດ້ວຍຄະນະບໍລິຫານງານ16 ສະຫາຍ ພ້ອມດຽວກັນນັ້ນກອງປະຊຸມໃຫຍ່ຍັງໄດ້ປ່ອນບັດຄັດເລືອກເອົາຜູ້ແທນຊາວໜຸ່ມໄປຮ່ວມກອງປະຊຸມຊາວໜຸ່ມທົ່ວແຂວງສາລະວັນ 10 ສະຫາຍ, ຍິງ 4 ສະຫາຍ ແລະ ຜູ້ແທນສຳຮອງ 3 ສະຫາຍ.

         ໃນຕອນທ້າຍກອງປະຊຸມ ຍັງໄດ້ຮັບຟັງຄຳໂອ້ລົມຂອງ ສະຫາຍ ຈັນສີລອນ ສີສົມບູນ ເຊິ່ງເພິ່ນໄດ້ມີບາງທັດສະນະດັ່ງນີ້:

-       ພະນັກງານສະມາຊິກຊາວໜຸ່ມ-ເຍົາວະຊົນບັນດາເຜົ່າ ໃນທົ່ວເມືອງຈົ່ງເພີ່ມທະວີຄວາມສາມັກຄີເປັນປຶກແຜ່ນແໜ້ນໜາ, ເປັນເຈົ້າຕົນເອງ ສ້າງຄວາມເຂັ້ມແຂງໃຫ້ຕົນເອງ ໃນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ VIII ຢ່າງສຸດໃຈ.

-       ຊາວໜຸ່ມ-ເຍົາວະຊົນເຮົາຕ້ອງມີຄວາມຫ້າວຫັນ ບຸກບືນເອົາໃຈໃສ່ສຶກສາຮ່ຳຮຽນຝຶກຝົນຫຼໍ່ຫຼອມຕົນເອງໃຫ້ມີຄວາມຮູ້ຄວາມສາມາດ ເພື່ອປະກອບສ່ວນເຂົ້າໃນການສ້າງສາພັດທະນາປະເທເຊາດທີ່ແສນຮັກໃຫ້ຈະເລີນຮຸ່ງເຮືອງ.

-       ຄະນະຊາວໜຸ່ມ ປະຊາຊົນ ປະຕິວັດລາວ ໃຫ້ຄຳໝັ້ນສັນຍາວ່າ: ຈະຂະຫຍາຍມູນເຊື້ອ ອັັັນສະຫງ່າອົງອາດ ຂອງພັກ-ລັດບົດບາດປະຈຸບານ ປະຕິວັດ ແລະ ວິລະຊົນຂອງຊາວໜຸ່ມລາວບັນດາເຜົ່າ, ເດັດດ່ຽວເດີນຕາມອຸດົມການຂອງພັກ ປະຊາຊົນ ປະຕິວັດລາວຢ່າງສົມສັກສີ.

ກອງປະຊຸມໄດ້ດຳເນີນມາເປັນເວລາ 1 ວັນ ແລະ ປິດລົງຢ່າງເປັນທາງການ ດ້ວຍຜົນສຳເລັດອັນ ສະຫງ່າງາມທີກອງປະຊຸມຍາດມາໄດ້.