Get Adobe Flash player

ໜ່ວຍຮາກຖານຊາວໜຸ່ມພະແນກພະລັງງານ ແລະ ບໍ່ແຮ່ ແຂວງສາລະວັນ ເປີດຂະບວນການແຂ່ງຂັນ 4 ບຸກ ປີ 2018

ເພື່ອປະຕິບັດຕາມຄໍາສັ່ງແນະນໍາເລກທີ 421/ລຂ ລົງວັນທີ 28 ກໍລະກົດ 2016 ​ວ່າດ້ວຍການຈັດຕັ້ງປະຕິບັດຂໍ້ແຂ່ງຂັນ 4 ບຸກ ໃນຕອນເຊົ້າວັນ​ທີ 5 ກັນຍາ 2018 ນີ້ ໜ່ວຍຮາກ​ຖານຊາວໜຸ່ມພະ​ແນ​ກພະລັງງານ ແລະ ບໍ່ແຮ່​ແຂວງສາລະວັນໄດ້​ເປີດ​ຂະ​ບວນການຂໍ້​​ແຂ່ງຂັນ 4 ບຸກ

ຢູ່ທີ່ຫ້ອງປະຊຸມຂອງພະ​ແນ​ກພະລັງງານ ແລະ ບໍ່ແຮ່​ແຂວງ, ພາຍໃຕ້ການເປັນປະທານຂອງ ທ່ານ ນິລັນດອນ ທອງມາລີ ຮອງເລຂາໜ່ວຍຮາກ​ຖານ​ຊາວໜຸ່ມພະ​ແນ​ກພະລັງງານ ແລະ ບໍ່ແຮ່ແຂວງ​ສາລະ​ວັນ, ​ໃຫ້ກຽດ​ເຂົ້າ​ຮ່ວມມີ ທ່ານ ແພງສີ ເມືອງຈັນ ຫົວໜ້າພະ​ແນ​ກພະລັງງານ ແລະ ບໍ່ແຮ່​ແຂວງ, ມີ   ທ່ານ   ສຸວຽງທອງ ສຸຂະ​ວົງ ຮອງ​ເລຂາ​ຄະນະ​ບໍລິຫານ​ງານ​ຊາວໜຸ່ມ ​ແຂວງ​ສາລະ​ວັນ   ພ້ອມດ້ວຍຫົວໜ້າຂະ​ແໜງ ຮອງຂະແໜງ​ ອົງການ​ຈັດ​ຕັ້ງ​ມະຫາຊົນ ແລະ ສະມາຊິກຊາວໜຸ່ມ​ເຂົ້າຮ່ວມທັງໝົດ 42 ທ່ານ, ຍິງ 11 ທ່ານ.

     ກອງປະຊຸມ ທ່ານ ພອນສຸກ ພົມມານະສາ ຄະນະໜ່ວຍຮາກ​ຖານ​ຊາວໜຸ່ມພະ​ແນ​ກພະລັງງານ ແລະ ບໍ່ແຮ່ແຂວງ​ສາລະ​ວັນ ກໍ່ໄດ້ຂື້ນຜ່ານແຜນການຈັດຕັ້ງປະຕິບັດຂະ​ບວນການ​​ແຂ່ງຂັນ 4 ບຸກ​ ຂອງຊາວໜຸ່ມໃນ 1 ປີຜ່ານມາ ​ເຊິ່ງ​ໄດ້​ວາງ​ແຜນ​ສູ້​ຊົນຄື: ບຸກດ້ານການເມືອງ - ແນວຄິດ ໃຫ້ບັນລຸໄດ້ 90% , ບຸກດ້ານຝຶກຜົນຫຼໍ່ຫຼອມຮໍ່າຮຽນ ໃຫ້ບັນລຸໄດ້ 95%, ບຸກດ້ານວຽກງານການຈັດຕັ້ງ ໃຫ້ບັນລຸໄດ້ 90%, ບຸກດ້ານວິຊາຊີບ ແລະ ສ້າງວຽກເຮັດງານທໍາ ໃຫ້ບັນລຸໄດ້ 80% ພາຍ​ໃນໜ່ວຍມີ​ສະມາຊິກ​ຊາວໜຸ່ມທັງໝົດ 30 ທ່ານ, ຍິງ 5 ທ່ານ, ມີ​ ຄະນະໜ່ວຍ 03 ທ່ານ,       ນອກຈາກນັ້ນ ກໍ່ໄດ້ປຸກລະດົມສະມາຊິກຊາວໜຸ່ມຂອງຕົນເຂົ້າຮ່ວມກິດຈະກຳຕ່າງໆທີ່ທາງຄະນະພັກ ອຳນາດການປົກຄອງຈັດຂື້ນໃນແຕ່ລະຄັ້ງຢ່າງເປັນຂະບວນຟົດຟື້ນ, ສູ້ຊົນໃຫ້ໄດ້ ໜ່ວຍຕົວແບບ 4 ບຸກ ​ແລະ ຍ້ອງຍໍ​ບຸກຄົນຕົວ​ແບບ 4 ບຸກ, ຜ່ານການຮັບຟັງແຜນໃນຄັ້ງນີ້   ແຕ່ລະສະຫາຍກໍ່ໄດ້ປະກອບຄຳເຫັນຢ່າງກົງໄປກົງມາເພື່ອໃຫ້ມີເນື້ອໃນຄົບຖ້ວນສົມບູນຂື້ນຕື່ມ ແລະ ໃນໜ່ວຍກໍ່ໄດ້ພ້ອມກັນຈັບມືແຂ່ງຂັນ.

       ໃນຕອນທ້າຍ ສະຫາຍ   ສຸວຽງທອງ ສຸຂະ​ວົງ ກໍ່ໄດ້ໂອ້ລົມຕໍ່ກອງປະຊຸມ ເພິ່ນໄດ້ເນັ້ນໜັກມີ 4 ບັນຫາ​ຄື:

  1. ​ຄະນະໜ່ວຍຊາວໜຸ່ມຕ້ອງຖືສໍາຄັນ ​ແລະ ກໍາແໜ້ນວຽກງານດ້ານການເມືອງແນວຄິດ,​ເອົາ​ໃຈ​ໃສ່​ປະຕິບັດ​ແນວທາງ​ນະ​ໂຍບາຍ​ຂອງ​ພັກ​ໃຫ້​ສະມາຊິກ​ຊາວໜຸ່ມ​ໄດ້​ເຂົ້າ​ໃຈ​ກ້ວາງ​ຂວາງ ​ແລະ ​ເລິກ​ເຊິ່ງ.
  2. ວຽກງານ​ປັບປຸງ​ການຈັດ​ຕັ້ງ ຄະນະໜ່ວຍຊາວໜຸ່ມຕ້ອງ​ໄດ້​ດໍາ​ເນີນ​ຊີວິດປະ​ຈໍາ​​ເດືອນ ​ແລະ ກໍ່ສ້າງ​ຊ່ວຍ​ເຫຼືອ​ເຊິ່ງກັນ ​ແລະ ກັນ ຢ່າງ​ເປັນ​ປົກກະຕິ.
  3. ​ເສີມ​ຂະຫຍາຍວຽກງານ​ຂະ​ບວນການ​ໃຫ້​ເປັນ​ຂະ​ບວນຟົດ​ຟື້ນ.
  4. ພາຍຫຼັງທີ່​ເປີດ​ຂະ​ບວນການ​ແລ້ວ ຕ້ອງ​ໄດ້​ເອົາ​ໃຈ​ໃສ່​ເພີ່ມ​ທະວີ​ຕໍ່ການ​ຕິດຕາມ​ກວດກາໃນ​ແຕ່ລະ​ໄລຍະ,​ຕ້ອງ​​ໃກ້ຊິດຕິດ​ແທດ​ກັບ​ຄະນະ​ພັກ​ໃນ​ການຂໍ​ຄໍາ​ຄິດ​ຄໍາ​ເຫັນ​ຊີ້​ທິດ​ເຍືອງ​ທາງ​ໃນ​ວຽກງານ​ຊາວໜຸ່ມ ກໍ່ຄື​ວຽກງານ​ແຂ່ງຂັນ 4 ບຸກຂອງ​ຊາວໜຸ່ມ​ປະ​ເມີນ​ແຕ່​ລະ​ຄັ້ງ.

ກອງປະຊຸມໄດ້ດຳເນີນເປັນເວລາ 1 ຄາບກໍ່ໄດ້ປິດລົງ