Get Adobe Flash player

ເມືອງລະຄອນເພັງ ປະກາດເປັນເມືອງ 4 ບຸກ ຄັ້ງທີ II ຕໍ່ເນື່ອງຕິດພັນກັບປະກາດເມືອງເຍົາວະຊົນທັນວາ 3 ດີ 4 ຮູ້

       ເພື່ອປະຕິບັດຕາມບົດແນະນຳ 421 / ລຂ,ລົງວັນທີ 28 ກໍລະກົດ 2016 ຂອງມະຕິກອງປະຊຸມໃຫຍ່ຄັ້ງທີ VII ຂອງສູນກາງ ຊາວໜຸ່ມປະຊາຊົນປະຕິວັດລາວແລະ ມະຕິ VI ຂອງກອງປະຊຸ່ມໃຫຍ່ຜູ້ແທນຊາວໜຸ່ມທົ່ວແຂວງສາລະວັນ,ວັນທີ 30 ສິງຫາ 2018 ນີ້ເມືອງລະຄອນເພັງໄດ້ຈັດພິທີປະກາດເປັນເມືອງ ຄຊປປລ 4 ບຸກ ຕິດພັນກັບປະກາດເມືອງເຍົາວະຊົນທັນວາ 3 ດີ 4 ຮູ້

ຢູ່ທີ່ສະໂມສອນໃຫຍ່ຂອງເມືອງລະຄອນເພັງ ໃຫ້ກຽດເປັນປະທານໂດຍ ທ່ານ ໄຊສະຫວັນ ເຄືອສິງ ຄະນະບໍລິຫານງານຊາວໜຸ່ມແຂວງສາລະວັນ, ເລຂາຄະນະບໍລິຫານງານຊາວໜຸ່ມເມືອງລະຄອນເພັງ,   ໃຫ້ກຽດເຂົ້າຮ່ວມເປັນຄະນະປະທານໂດຍ

ທ່ານ ບຸນທຽມ ແກ້ວ ໄຊຍະວົງ ຮອງເລຂາພັກແຂວງ, ປະທານຄະນະກວດກາ ແຂວງສາລະວັນ, ທ່ານ ຈັນສີລອນ ສີສົມບູນ ກຳມະການພັກແຂວງ, ເລຂາຄະນະບໍລິຫານງານຊາວໜຸ່ມແຂວງ, ທ່ານ ບຸນທະວີ ພິມມະສານ ຮອງເລຂາພັກເມືອງ ຜູ້ຊີ້ນຳວຽກງານອົງການຈັດຕັ້ງມະຫາຊົນ, ມີຄະນະບໍລິຫານງານຊາວໜຸ່ມອອ້ມຂ້າງເມືອງ, ເລຂາຊາວໜຸ່ມກຸ່ມບ້ານ ແລະ ສະມາຊິກຊາວໜຸ່ມ ເຂົ້າຮ່ວມທັງໝົດ 156 ຄົນ,ຍິງ 61 ຄົນ.

       ທ່ານ ໄຊສະຫວັນ ເຄືອສິງ ໄດ້ຜ່ານບົດສະຫຼຸບ ແລະ ທິດທາງແຜນການໃນການຈັດຕັ້ງປະຕິບັດຂໍ້ແຂ່ງຂັນ 4 ບຸກ ແລະ ຂໍ້ແຂ່ງຂັນ 3 ດີ 4 ຮູ້ຂອງເຍົາວະຊົນ ຕໍ່ບັນດາແຂກ ແລະ ຜູ້ແທນທີ່ເຂົ້າຮ່ວມຄື: ບຸກດ້ານການເມືອງແນວຄິດ: ຄະນະບໍລິຫານງານຊາວໜຸ່ມເມືອງພະຍາຍາມເອົາໃຈໃສ່ຊຸກຍູ້ ຕິດຕາມການສຶກສາອົບຮົມທາງດ້ານການເມືອງແນວຄິດ ຕິດພັນກັບການປັບປຸງການຈັດຕັ້ງຊາວໜຸ່ມ - ເຍົາວະຊົນເປັນຕົ້ນແມ່ນໄດ້ນຳເອົາເອກະສານມະຕິ, ຄຳສັ່ງແນະນຳຕ່າງໆມາເຊື່ອມຊືມ ມີສະມາຊິກຊາວໜຸ່ມ - ເຍົາວະຊົນ ເຂົ້າຮ່ວມ 5,084 ເທື່ອຄົນ,ຍິງ 2,348 ເທື່ອຄົນ, ດ້ານນີ້ສາມາດບັນລຸໄດ້ 100%, ດ້ານການຝຶກຝົນຫຼໍ່ຫຼອມຮໍ່າຮຽນ: ຄະນະບໍລິຫານງານຊາວໜຸ່ມເມືອງພະຍາຍາມເອົາໃຈໃສ່ຊຸກຍູ້ໃຫ້ສະມາຊິກຊາວໜຸ່ມ - ເຍົາວະຊົນ ໄດ້ໄປຍົກລະດັບຄວາມຮູ້ດ້ານວິຊາຊີບ, ວິຊາສະເພາະ ດ້ານນີ້ສາມາດບັນລຸໄດ້ 100%, ບຸກດ້ານວຽກງານການຈັດຕັ້ງ: ຄະນະບໍລິຫານງານຊາວໜຸ່ມເມືອງພະຍາຍາມເອົາໃຈໃສ່ຊຸກຍູ້ປັບປຸງ ແລະ ຂະຫຍາຍການຈັດຕັ້ງໃຫ້ເພີ່ມຂື້ນໃນແຕ່ລະປີ ເຊີ່ງໃນປະຈຸບັນທົ່ວເມືອງມີ 108 ໜ່ວຍ, ສາມາດຮັບຮອງເປັນໜ່ວຍ 4 ບຸກໄດ້ 102 ໜ່ວຍ ,ສະມາຊິກຊາວໜຸ່ມປະຊາຊົນ ປະຕິວັດລາວມີ 3.562 ທ່ານ,ຍິງ 1,158 ທ່ານ. ສະມາຊິກເຍົາວະຊົນທັນວາທັງໝົດ 3,651 ນ້ອງ,ຍິງ 1,839 ນ້ອງ, ຈັດແບ່ງກອງເຍົາວະຊົນທັນວາອອກເປັນ 23 ກອງ,ມີ 69 ໝວດ, 207 ໜູ່, ຕົວແບບກອງ 3ດີ 4 ຮູ້ ໄດ້2 ກອງ. ດ້ານນີ້ບັນລຸໄດ້ 100%, ບຸກດ້ານວິຊາຊີບສ້າງວຽກເຮັດງານທຳ: ຄະນະບໍລິຫານງານຊາວໜຸ່ມເມືອງໄດ້ເອົາໃຈໃສ່ຊຸກຍູ້ໃຫ້ຊາວໜຸ່ມໄດ້ມີວິຊາຊີບສ້າງວຽກເຮັດງານທຳເຊັ່ນ ການປູກຝັງ,ລ້ຽງສັດ ແລະ ຍັງສ້າງກອງທືນຊ່ວຍເຫຼືອເຊີ່ງກັນ ແລະ ກັນຂຶ້ນຂອງແຕ່ລະໜ່ວຍບໍ່ຕ່ຳກວ່າ 500,000ກີບ,ທົ່ວເມືອງມີເງິນກອງທຶນທັງໝົດ 54 ລ້ານກວ່າກີບ ດ້ານນີ້ສາມາດບັນລຸໄດ້ 100 %. ແລະ ພ້ອມກັນວາງ ຄາດໝາຍສູ້ຊົນພ້ອມທັງຂື້ນຈັບມືແຂ່ງຂັນຄື: ບຸກດ້ານການເມືອງແນວຄິດ: ດ້ານນີ້ສູ້ຊົນໃຫ້ໄດ້ 100% , ດ້ານການຝຶກຝົນຫຼໍ່ຫຼອມຮໍ່າຮຽນ: ດ້ານນີ້ຈະສູ້ຊົນໃຫ້ໄດ້ 100%, ບຸກດ້ານວຽກງານການຈັດຕັ້ງ: ດ້ານນີ້ຈະສູ້ຊົນໃຫ້ໄດ້ 100%, ບຸກດ້ານວິຊາຊີບສ້າງວຽກເຮັດງານທຳ: ດ້ານນີ້ຈະສູ້ຊົນໃຫ້ໄດ້ 100%, ແລະ ຂໍ້ແຂ່ງຂັນ 3 ດີ 4 ຮູ້ຂອງເຍົາວະຊົນທັນວາໃນແຕ່ລະດ້ານໃຫ້ບັນລຸ 90% ຂື້ນໄປ

         ຕອນທ້າຍຍັງໄດ້ຮັບຟັງຄຳໂອ້ລົມ ແລະ ຊີ້ທິດເຍືອງທາງຂອງທ່ານ ບຸນທຽມ ແກ້ວໄຊຍະວົງ ທ່ານໄດ້ຍົກໃຫ້ເຫັນໝາກຜົນໆງານການເຄື່ອນໄຫວຂອງຊາວໜຸ່ມທີ່ຍາດມາໄດ້ ຄຽງຄູ່ກັບການສ້າງສາພັດທະນາປະເທດ ແລະ ທ່ານຍັງເນັ້ນໜັກຕື່ມອີກມີບາງທັດສະນະດັ່ງນີ້: 1. ຄະນະຊາວໜຸ່ມແຕ່ລະຂັ້ນຕ້ອງໄດ້ເອົາໃຈໃສ່ສືບຕໍ່ສຶກສາອົບຮົມການເມືອງ - ແນວຄິດຊາວໜຸ່ມ - ເຍົາວະຊົນຕິດພັນກັບການສ້າງຂະບວນການ ເຊືອມຊືມທຸກມະຕິຄຳສັ່ງຂອງຂັ້ນເທີງວາງອອກເພື່ອຕ້ານ ແລະ ສະກັດກັ້ນປະກົດການຫຍໍ້ທໍ້ໃນສັງຄົມທຸກຮູບແບບ, ຈຳແນກໄດ້ມິດ ແລະ ສັດຕູ້.

2.   ຕ້ອງຝຶກຝົນຫຼໍ່ຫຼອມຮໍ່າຮຽນຮອບດ້ານ ຮຽນວິຊາສະເພາະ,ວັດທະນາທຳປະເພນີ,ປະຫວັດສາດ,ຄຸນສົມບັດສີມທຳປະຕິວັດຂອງທ່ານຜູ້ນໍາ.

3. ຕ້ອງໄດ້ປະກອບສ່ວນເຂົ້າໃນການປ້ອງກັນຊາດປ້ອງກັນຄວາມສະຫງົບເພື່ອຕ້ານ ແລະສະກັດກັ້ນປະກົດການຫຍໍ້ທໍ້ໃນສັງຄົມ

4.   ໃຫ້ຖືເອົາວຽກງານນີ້ຕິດພັນກັບວຽກງານສະເພາະຂອງແຕ່ລະກົມກອງ ຮາກຖານໂດຍສະເພາະແມ່ນສະມາຊິກຊາວໜຸ່ມ.